شهوة جسـم

ـ1ـ
لَوْ كَانْ عِنْدِي لِلْخَطِيِّه مَيْلْ
كِنْتْ سْبَحِتْ بِبْحُورْ عِينَيْكِي
وْكِنْت وْصِلِتْ عَ شّطّ هَاك اللَّيْلْ
مَطْرَحْ مَا فِينِي إِحْصَل عْلَيْكِي!!
ـ2ـ
كنت كْتَبتْ عَ وْرَاقْ وَرْدَاتِكْ
أَشْعَارْ صَعْب كْتِيرْ تِمْحِيهَا
تَا كِلّ مَا قْطَفْتِي بْدَيَّاتِكْ
وَرْدِه.. تْشِمِّيهَا وْتِقْرِيهَا
ـ3ـ
وْكِنتْ عَ بَابِكْ وْقِفت سْنِينْ
حامِلْ كَمَنْجَه وْبَاقِة رْيَاحِينْ
تَا كِيفْ مَا تْرُوحِي وْتِجِي عَ الدَّرْبْ
غَنِّي لْعُيُونِكْ أَجْمَل تْلاحِينْ
ـ4ـ
وْكنت بِالْغِيرِه زْرَعِتْ قَلْبِكْ
وْقَلْبِكْ طفلْ مَا دَاقْ طَعْم الْحُبّْ
تَا تْطَاوْعِينِي.. وْتشكرِي رَبِّكْ
عَ هَالْمَحَبِّه الْـ مُشْ سَايِعْهَا الْقَلبْ
ـ5ـ
لَوْ كانْ بَدِّي.. بَسّ مَا بَدِّي
وَسِّخْ ضَمِيرِي وْغَبِّرْ عْيُونِي
وْشَمْس الطَّهَارَه تْصِيرْ مِسْوَدِّه
كِرْمَالْ شَهْوِة جسم مَجْنُونِه

**