مراهقة

الغلاف

2006-04-20T17:59:00.000-07:00

استمعوا إلى قصائد هذا الديوان بصوت شربل بعيني

Charbel Baini
Morahiqa
The adolescent

اقلب الصفحة من فضلك

إمارة الشعر

2006-04-20T17:58:00.000-07:00

البراءة الأولى ـ 2000
حيث أن الأستاذ شربل بعيني كان، ولأكثر من ربع قرن، ويبقى سيّد الكلمة والقلـم في عالـم الإنتشار.
وحيث أن الأستاذ شربل بعيني قد جنّد حياته وقلمه لتربيّة الأجيال، وأغنى المكتبات العامّة بأدبه ومؤلّفاته.
وحيث أن الأستاذ شربل بعيني أصدر أكثر من 25 كتاباً، وارتفع باللغة والأدب والتربيّة والتعليم إلى أعلى مستويات الأبجديّة، وأصبح (قدموس) الثاني في التراث الفكري والثقافي والحضاري الذي أعطاه للعالـم، هذا العطاء الذي أمامه يتضاءل كل عطاء.
وحيث أن الأديب شربل بعيني قد وفّر بعطائه الأدبي والفكري والتربوي ما يوفّر للإنسانيّة أسباب العزّة والكرامة.. فكانت أنشودته (الحرف والكلمة)، وكان الفكر الخلاّق يستوي على عرشه.. وحدود أرضه قد ضاقت بطاقاته، فراح يوسّع حدوده إلى أقمار الدنيا، فاغترب عن لبنان إلى أستراليا في العام 1971.
وحيث أن كبير أدباء موطن الأرز الأستاذ شربل بعيني قد فتح صفحات التاريخ، وترك تلك الصفحات تتكلّم، فأصبح موسيقى العذارى على فـم الأنبياء، الذين أحنوا الجبين أمام عظمة الأدب والفكر والكلمة.
وحيث أن الأستاذ بعيني قلّده المفكرون والأدباء والشعراء وأسياد التراث الحضاري والفكري، ومنهم الحكومة اللبنانيّة، أكثر من 20 من الأوسمة والميداليّات المذهّبة عربون إجلال وإكبار لمستواه الأدبي الرفيع..
لهذه الأسباب المشرّفة، وهذه المقوّمات الأدبيّة الشامخة، وهذا المستوى الثقافي الرفيع، كان لنا الفخر، كل الفخر، في المجلس القاري للجامعة اللبنانيّة الثقافيّة في العالـم، أن ننتخب من بين 41 مرشّحاً من خيرة الأدباء اللبنانيين، الأستاذ شربل بعيني أمير الأدباء اللبنانيين في عالـم الإنتشار.
الرئيس الدكتور جوزيف حايك
**
البراءة الثانية ـ 2001
حيث أن الأستاذ شربل بعيني، كان ويبقى، سيّد المنابر، يدغدغ بأشعاره أعماق النفس، ويعالج ما تعاني الإنسانيّة من شدائد ومتاعب وملمّات..
وحيث أن شربل بعيني، العبقري الملهم، كان ولأكثر من ثلاثة عقود من زمن الخير والعطاء، قد كرّس حياته لعذوبة الشعر، ولجأ إلى سكون النفس، يعبّ من خيال فيه إبداع، ومن غذاء ملحمي في الروح، ومن شاعريّة فيّاضة لا زخرف فيها ولا ميوعة..
وحيث أن الأستاذ شربل بعيني، بكل إعجاب وإكبار وإجلال، تغنّى به الشعراء والمعجبون، وكتب الأدباء والمفكّرون، وقرّظ المثقّفون والصحفيّون، وقلّدته الحكومة اللبنانيّة، وعدد من الدول الحرّة، أكثر من 20 ميداليّة من الميداليّات المذهبّة..
وحيث أن سيّد الشعراء والأدباء، الأستاذ شربل بعيني، قد ضاقت بطاقاته أرض وطنه في لبنان، فاغترب إلى أستراليا في العام 1971، وتوسّع في أغاني الشعر الكلاسيكي، يسلخ الكلمة حارّة من أعماقه، متميّزاً بولاء قومي وحنين مهجري، وأغنى المجتمعات بأكثر من 30 كتاباً من أشعاره الرائعة، ومن أدبه الرفيع..
وحيث أن الأستاذ بعيني، في أسلوبه عذوبة نسيمات الصباح في لبنان، وفي تسلسله عمق وتفكير ووحدة بناء، وأغانيه جداول في نعومة أيّار، وموسيقاه عذوبة الصيف في شهر تموز..
فلهذه المقوّمات السحريّة، شعراً أدباً وثقافة، كان لنا الفخر في المجلس القاري للجامعة اللبنانية الثقافيّة في العالـم أن ننتخب من بين 67 مرشّحاً من خيرة الشعراء اللبنانيين في العالـم: الأستاذ شربل بعيني أمير الشعراء اللبنانيين في عالـم الإنتشار مدى الحياة.

الرئيس الدكتور جوزيف حايك

اقلب الصفحة من فضلك

يا مراهقة

2006-04-20T17:54:00.000-07:00

عمر
ـ1ـ
بَيْني وْبَيْنَكْ، يا كْتابي، عُمرْ
وْغُرْبِة سْنين وْقَهْرْ
وِبْناتْ مِتل الزَّهْر
دِبْلِتْ عَلَى بْوابِي
تا تْفَرْفِحْ شْبابي
ـ2ـ
بَيْني وْبَيْنَكْ كِذْب مَا لُو حْدُود
بيطيرْ يَوْمِيِّه
مِنْ تِمّ مُشْ مَوْجُودْ
إِلاَّ بْخَبْرِيِّه
بْتُوقَعْ عَلَى الْمَاشِي
وِبْتِحْمِلا فْرَاشِه
عَ شْفَافْ زَهْرِيِّه
وْمِتْل الْحُلمْ بِتْضِيعْ بِغْبَاشِه!!
ـ3ـ
بَيْنِي وْبَيْنَكْ سَالْفَيْن زْغَارْ
قَعْدِت عْلَيْهُنْ غَبْرِةْ الأيَّامْ
شَابُوا.. وْأَنَا مِنْ شَيْبِتُنْ مِنْضَامْ
وْمُحْتَارْ كِيف بْدَارِيُنْ مُحْتَارْ
تَا ضَلّْ شَبّْ زْغِيرْ
بِعْيُونْ فَرْفُورَه
بْتِكْرَهْ التَّنُّورَه
الْـ مُشْ لاحِقَا تِقْصِيرْ!!
ـ4ـ
عِشْرِينْ سِنِه يَا مْرَاهْقَه
مَرْقِتْ كَأَنَّا حُلْمْ
شَتِّتْ حُرُوب وْسِلْمْ
وِقْلُوبْ سَوْدَا مْنَافْقَه
وِقْلُوبْ مِتْل التَّلْجْ
خِلْقِتْ زْهُور بْمَرْجْ
وِقْمَارْ تِرْهُجْ رَهَجْ
وِبْحُورْ زَرْقَا رَايْقَه!!
ـ5ـ
لا تِضْحَك عْلَيِّي
يَا بِكِرْ أَوْلادِي
يا حْرُوفْ بَعْدَا مْعَلّقَه فِيِّي
وْمِنْ نُورْ عِينَيِّي
عَمْ تَاكُل زْيَادِه
الْحُكَّامْ.. ظَلْمِتْنِي
وْبِالْهَجْر رِمْيِتْنِي
وْمِنْ أَرْض خَضْرَا بِعْبِدَا عْبَادِه
جَنِّت وْطَرْدِتْنِي
تَ الْجَوّْ يِصْفَالاَ
وْيِتْوَسَّع مْجَالاَ
وْكِل مَا بْيِحْلالاَ
تِتْزَعْرَن.. وْتِتْوَسَّخ بْلادِي!!
**
كذبة
كِذْبِه الْعُمرْ.. مِينْ قَالْ مَا كْذِبْنَا
وْعُبّ الْفَرَحْ خَبَّى مَصَايِبْنَا؟!
نِحْنَا إِذَا مْنِتْعَبْ عَ دَرْب الْعُمْرْ
مُشْ قَدّ مَا الْمَحْبُوبْ يِتْعِبْنَا.
**
ختيار
ـ1ـ
خِتْيَارْ.. يَا شَرْبِلْ صِرِتْ خِتْيَارْ
وْبَعْدَكْ بلا شَمْس وْبلا أَقْمَارْ
قِصْرَانْ؟.. أَمْ إِنَّكْ يَا شَاعِرْنَا
عِشْت الْعُمرْ كِلُّو بْإِسْتِهْتَارْ؟!!
ـ2ـ
مْنَعْرِفْ بِـ شِعْرَكْ رَاسِم تْكَاوِينْ
مْنَعْرِفْ بِـ شِعْرَكْ عَامِل تْلاَحِينْ
مْنَعْرِفْ بِـ شِعْرَكْ جَنِّت الْحِلْوِينْ
لَكِنْ، يَا حَسْرَه، مِسْتِحِي وْمَخْجُولْ
تْنَقِّي شِي حِلْوِه.. تْخَزِّق الْمَرْيُولْ
وِتْلَبِّسَا فِسْتَانْ وَرْد وْغَارْ!!
ـ3ـ
وْسَاعِتَا.. بْتْطَلِّقْ الدَّفْتَرْ
وْبِتْصِيرْ بَدَّكْ تِشْرَب وْتِسْكَرْ
وْخَلْف مِنَّكْ بَابَك مْسَكَّرْ
مِنْ رِيقْ أَنْقَى مِنْ نَبعْ كَوْثَرْ
مْنِ نْهُودْ أَغْلَى مْنِ الدِّنِي كِلاَّ
بْتِحْرُقْ صَابِيعْ اللِّي بْيُوصَلاَّ
وْكِلْ مَا انْحَرَقْت بْتِرْكَعْ لأَللَّـه
وْبِتْقُولْ بَدِّي إِنْحِرِقْ أَكْتَرْ
وْمِتْل الْفَرَاشِه إِنْتِحِرْ بِالنَّارْ
خِتْيَارْ يَا شَرْبِلْ صِرِتْ خِتْيَارْ!!
**
يا مراهقة
ـ1ـ
وْلِكْ.. قَصّرِي الْفُسْتَانْ
يَا مْرَاهْقَه أَكْتَرْ
تَا تْكَزْكِز الأَسْنَانْ
وِالْقَلْبْ يِتْحَسَّرْ
وْلا تْغِرِّكْ الشُّبَّانْ
وِخْصُوصاً الأَسْمَرْ
الْـ مِنْ حُسْنِك الْفَتَّانْ
عِينَيْهْ عَمْ تِسْكَرْ!!
ـ2ـ
يَا مْدَهّبِه الشَّعْرَاتْ
وْلابْسِه الأَحْمَرْ
لا تْغَنْدرِي الْمَشْيَاتْ
بْتِسِحْرِي الأَشْقَرْ
وْيَا حُلْوِة الْحُلْوَاتْ
لَيْلِيِّه عَمْ إِسْهَرْ
تَا إِكْتُب حْكَايَاتْ
حُبِّك بْدَفْتَرْ!!
**
عوينات
عْوَيْنَاتْ سُود كْبَارْ
خِفْيِت عْيُون زْغَارْ
غَطِّتْ مَسَاحَه وْصَارْ
وِجِّكْ عَتمْ وِنْهَارْ
يَا لابْسِه الإِيشَارْ
لا تِلْعَبِي بِالنَّارْ
حُبِّي وِقِفْ عَ شْوَارْ
هَيْدَا آخِرْ إِنْذَارْ
بْقلِّكْ مَع التِّكْرَارْ:
عْوَيْنَاتْ مِنْهَا بْغَارْ.

اقلب الصفحة من فضلك

فن الغمز

2006-04-20T17:51:00.000-07:00

فن الغمز
مَبْرُوكْ هَـ الْفُسْتَانْ يَا جَارَه
الْمَقْصُوصْ شِبْر وْنُصّْ
وِالْـ بَيَّن عْوَامِيدْ مُحْتَارَه
عْوَامِيدْ حُلْوِه بُرْصْ
شُو قِصِّة الشُّبَّانْ بِالْحَارَه
الْمسْكِينْ صَايِرْ لِصّْ؟!
وْخِتْيَارْ عَمْ بِتْشَلوطُو حْرَارَه
وْعَ مَيْلْ قَلْبُو يْعُصّْ
وِيْقُولْ: هَـ الْفُسْتَانْ يَا خْسَارَه
لَوْ كَانْ بَعْد انْقَصّْ!!
**
ريق ونهد
ـ1ـ
لِلْحَقِيقَه.. لِلْحَقِيقَه
سْكِرْتْ لَمَّا شْرِبِتْ رِيقَا
تِهِتْ وِنْسِيت الْخَلِيقَه!!
ـ2ـ
وْصِرْت إِتْمَايَلْ يَمِينْ
وْمُجّ مَجِّه مِنِ جْبِينْ
الشَّمْسْ.. مِنْ أَحْلَى رْفِيقَه
ـ3ـ
وْتَخْت مَفْرُوش بْحَرِيرْ
بْزَنْبَق.. بْوَرْد.. بْعَبِيرْ
وْشَبّ عَمْ يِنْشُلْ غَرِيقَه
ـ4ـ
وْكِيفْ مَا تْحِرَّكِتْ كِيفْ
اللَّيْلْ وَاقِفْلِي عَرِيفْ
بْيِحْسُب عْلَيِّي الدّقِيقَه
ـ5ـ
بِنْطُرْ السَّاعَه الْعَزِيزِه
بِشْبَع.. بْطَفِّي الْغَرِيزِه
بْخَمْرِة النَّهْد الْعَتِيقَه
ـ6ـ
بْلَيْلِة الْحُبّ الطَّوِيلِه
بْفَيِّة الْحَلْمِه الْجَمِيلِه
بِرْتِفِعْ فَوْق الْخَلِيقَه!!
**
يا جارة
ـ1ـ
مِنْ إِيدِكْ زِتِّي السِّيكَارَه
السِّيكَارَه مْضُرَّه يَا جَارَه
وْأَمْرَاض الْـ فِيهَا غِدَّارَه
ـ2ـ
مَشْحُونِه بْسِلّ وْسَرَطَانْ
وْيَا جَارَه عْلَيْكِي فِزْعَانْ
بْرَبِّكْ لا تْدُوقِي الدّخَّانْ
ـ3ـ
الدَّخْنِه اللِّي بْصَدْرِكْ بِتْصِيرْ
بْتِهْرِي الصّدْر كْتِير كْتِيرْ
وْبِتْقَصِّرْ عُمْرِك بَكِّيرْ
ـ4ـ
بْخَاف عْلَيْكِي مْنِ التّدْخِينْ
بْخَاف يْصِيرُوا دبْلانِينْ
خْدُود اللِّي نَاطِرْهَا سْنِينْ!!
**
ليش البكي؟
ـ1ـ
لَيْش الْبِكِي؟!.. دْمُوعِكْ مَطَرْ
شُو اللِّي عَلَى بَالِكْ خَطَرْ؟!
شُو مْزَعَّلِكْ.. قُولِي.. وْأَنَا
تَا إِبْسِطِكْ بِمْحِي الْبَشَرْ؟!
ـ2ـ
بْيِكْفِي بِكِي.. قَلْبِي انْفَطَرْ
وْمَا فِي حَدَا قَدِّي انْقَهَرْ
وْتَا تِضْحَكِي ضِحْكِةْ هَنَا
لا تْفَكّرِي بْهَاب الْخَطَرْ!!
ـ3ـ
شُو مْزَعّلِكْ؟.. إِنْتِي الْقَمَرْ
إِنْتِي السِّحرْ فِيكِي انْسَحَرْ
لَيْلَى.. إِذَا بْكِيتِي بَعْدْ
عَمْ هَدِّدِكْ.. قَيْس انْتَحَرْ!!
**
التخت تكسّر
ـ1ـ
صَدْرِكْ.. قَاسِي وِمْحَجَّرْ
جِسْمِكْ.. أَحْلَى مْنِ الْمَرْمَرْ
بِتْذَكَّرْ لَيْلِه بْتِشْرِينْ
شْرِبْنَا مْنِ اللّذِه أَكْتَرْ
تَلْج.. وْكِنَّا بِرْدَانِينْ
بْيِنْقِصْنَا الْجَمْر الأَحْمَرْ
ـ2ـ
تْنَاجَيْنَا.. وْكِتَّرْنَا نْبِيدْ
وْمِنْ أَوّلْ كاس مْنِسْكَرْ
عِبَّيْنَا الأُوضَه تِنْهِيدْ
مِسْكِين التَّخْت تْكَسَّرْ
وْكِل مَا شَهْوِتْنَا بِتْزِيدْ
بِتْصَفِّي اللّعْبِه أَخْطَرْ!!

اقلب الصفحة من فضلك

فرفورتي

2006-04-20T17:39:00.000-07:00

فرفورتي
ـ1ـ
فَرْفُورْتِي الْجَمِيلِه
يَا زْغَيَّرَه.. وْطَوِيلِه
وْيَا بِنْت سِتَّعْشَرْ سِنِه
أَوّلْ مَا قَلْبِي مْجَنِّنِه
وْمَا فِي بْيَدِّي حِيلِه!!
ـ2ـ
فَرْفُورْتِي الْحَبِيبِه
أَعْمَالِك الْغَرِيبِه
أَعْمَالْ سِنّ الْوَلْدَنِه
وْأَمْرَارْ عَمْ تِتْشَيْطَنِي
بِظْرُوفِي هَـ الْعَصِيبِه!!
ـ3ـ
فَرْفُورْتِي الصَّبِيِّه..
يَا مْرَاهْقَه.. وْغَبِيِّه
بِالْغَدْر عِمَّرْتِي دِنِي
وْبَعْدِكْ مِتِلْ شِي سَوْسَنِه
بْتِدَلَّعِي بْحِنِّيِّه!!
ـ4ـ
يَا قَاسْيِه وْحَنُونِه
يَا مْطَيَّرَه جُنُونِي
بِالطَّيْش لا تِتْزَيَّنِي
وْبِالْحُبّ لا تِتْفَنَّنِي
الْحُبّ جُوَّا عْيُونِي!!
ـ5ـ
فَرْفُورْتِي الْخَجُولِه
شُو صَايبِكْ؟.. قُولِي
تَا بْزِينْتِكْ عَمْ تِعْتِنِي
وْمِنْ دُونْ زِينِه مْجَنِّنِه
فَصِيلْة الرُّجُولِه!!
**
صدرك
ـ1ـ
صَدْرِكْ جَبَلْ عَالِي
وْأَنَا التَّلْجَاتْ
عَـمْ دُوبْ بِلْيَالِي
هَنَا وْآهَاتْ
حِنِّي عَلَى حَالِي
ـ2ـ
صَدْرِكْ صَخرْ مَرْمَرْ
وْفِي تَلْتَيْن بْرُوحْ
تْرَابُنْ جِلدْ أَسْمَرْ
عْلَيْهُنْ تِجِي وِتْرُوحْ
نَسْمِةْ هَوَا شْمَالِي
ـ3ـ
صَدْرِكْ هَـ الِمْكَبَّرْ
وْمِرْتِفِعْ رَاسُو
عْيُونِي عَمْ تِسْكَرْ
بِـ رَعْشِة حْوَاسُو
اللِّي خَمرْهَا غَالِي
ـ4ـ
ما أَلْطَفُو صَدْرِكْ
هَـ الدَّافِي بِكْوَانِينْ
وْلَوِّينِي عَ جَمْرِكْ
يَا أَجْمَل الْحِلْوِينْ
مَا عِدْتْ رَحْ بَالِي.
**
نهودك
ـ1ـ
شُو هَـ النُّهُود الْعَالْيِه
عْيُون الْخَلِيقَه مَالْيِه
وْمَهْمَا شِفِتْ عِنْد النِّسَا
بْتِبْقَى نْهُودِكْ غَالْيِه
تِحْيَا النُّهُود الْعَالْيِه!!
ـ2ـ
صْدُور الصَّبَايا مْكَبَّسَا
وِمْرَوَّضَا.. وِمْدَرَّسَا
نْهُود النِّسَا اللِّي مْبَوَّسَا
صَارِتْ يَا رُوحِي بَالْيِه
وْبَعْدَا نْهُودِكْ عَالْيِه!!
ـ3ـ
نْهُودِكْ يَا أَحْلَى مْنِ الدِّنِي
بِرْكَعْلِك قْبَالُنْ سِنِه
مِتْكَبَّر.. وْصَايِرْ دَنِي
كِرْمَالْ خَمْر الدَّالْيِه
وْعَيْن النُّهُود الْعَالْيِه!!
**
متلك أنا
بْتِسْمَحِي نِرْقُصْ سَوَا
يَا شَارْدِه بلَيْلِةْ سَهَرْ
تَا نْدَرْدِش كْلام الْهَوَى
وْنِتْغَزَّل بْحُسْن الْقَمَرْ
مْنِرْقُصْ عَلَى صْفِير الْهَوَا
وْعَ خَشِّة وْرَاق الشَّجَرْ
قَالُوا الرَّقصْ أَحْسَنْ دَوَا
الْـ بِيجَرِّبُو بْيِنْسَى الْبَشَرْ
وْمِتْلِكْ أَنَا قَلْبِي انْكَوَى
وْشُو خَيَّمْ عْلَيِّي الضَّجَرْ
وْرَحْ إِلْتِجِي بَعْد النَّوَى
لِلرَّقْص عَ بَرْد الْحَجَرْ!!
**
سكّير
ـ1ـ
سِكِّير.. وْمَا بْدُوق الْخَمْر
سِكِّير لآخِرْ دَرْجِه
بِسْكَرْ مِنْ نَهْدَيْكِ السّمْرْ
وْمِنْ أَحْلَى صنْدُوقْ فُرْجِه!!
ـ2ـ
بِشْرَبْ مِنْ خَدَّيْكِ الْحُمْرْ
كَاسَيْن تْلاتِه وْأَكْتَرْ
تَخْت وْعَتْم وْمَوْقِدْ جَمْرْ
وْمَعْ أَطْيَبْ مَازَه بِسْكَرْ
ـ3ـ
وْبِعْصِرْلِكْ نَهْدَيْكِ عَصْرْ
وْتِنْهِيدِكْ مَلاَّ الأُوضَه
وْبِسْهَرْ حَتَّى طْلُوع الْفَجْرْ
وْبِسْكَرْ عَ آخِرْ مُوضَه!!

اقلب الصفحة من فضلك

كرمال عينك

2006-04-20T17:35:00.000-07:00

كرمال عينك
ـ1ـ
كِرْمَالْ عَيْنِكْ شَمِعْتِي ضُوَّيْتْ
وِتْرَكِتْ عَيْش اللَّيْل يَا عْيُونِي
وْمَا عِدْتْ إِسْهَرْ يَوْم بَرَّا الْبَيْتْ
وْلا عِدْتْ إِشْرَبْ خَمْرِة جْنُونِي
وِبْشَبَابِي كْتِيرْ شُو انْغِرَّيْتْ
وْغَامَرْتْ مَعْ حِلْوِينْ غَشُّونِي
وْأَمْوَالْ بِسْبَاق الشَّقَا زِتَّيْتْ
خْسِرْتْ مَالِي.. وْخَابِت ظْنُونِي
وْعَ حَصِيرِه عَارْيِه صِفَّيْتْ
الأَصْحَابْ وِالأَحْبَابْ تَرْكُونِي
وْمَا يْئِسْتْ مَرَّه بْهَـ الدِّنِي تْرِبَّيْتْ
وِعْرِفْت لَيْش كْتَارْ نِسْيُونِي!!
ـ2ـ
وْضِلَّيْتْ جَاهِدْ تَا رْجِعْت بْنَيْتْ
مَجْدِي الْـ فِقِدْ وِتْحَسّنِتْ حَالِي
وْيَا حَيَاتِي كْتِيرْ شُو انْحِبَّيْتْ
وْشُو كِتْرِت الأَصْحَابْ مَعْ مَالِي!!
وْقِرَّرْت أَسِّسْ لِلسَّعَادِه بَيْتْ
حِبَّيْتْ حِلْوِه خِلِقْهَا عَالِي
وْلا تِسْأَلِينِي مِينْ هَـ الْـ حِبَّيْتْ
بْتَعِرْفِيهَا وْشَاغْلِه بَالِي؟
هَيْدِي الْحَقِيقَه وْسِرّ مَا خِبَّيْتْ
حْكِيتْ الصَّرَاحَه وْهَيْك أَحْلالِي
وْيَا مَا بْلَيَالِي بَارْدِه صِلَّيْتْ
تَا إِحْتِفِظ بِـ حُبِّك الْغَالِي
**
جيرك
إسم رقصة عرفت بالستينات
ـ1ـ
جِيرْكْ.. بَدِّكْ تِرِقْصِي؟!
تِكْرَم عْيُونِكْ..
لِلْجِيرْكْ فَاتِحْ مَدِرْسِه
نَاقْصَه بْدُونِكْ
وْرَقْصَاتْ فِيهَا مْكَدّسِه
تَأْلِيفْ مَجْنُونِكْ
وْرَحْ نِبْتِدِي يَا آنسِه
بَيّنِي فْنُونِكْ!!
ـ2ـ
آهْ يَا مَشَاللّـه مْعَلّمِه
بْفَنّ الرَّقِصْ
وْجَايِي تَا تِتْعَلّمِي
عْطَيْتِي دَرِسْ!!
رَيْتِكْ يَا حِلْوِه تِسْلَمِي
مِنْ كِلّ نَحِسْ
وْيَا هِنْد.. حَقِّكْ عَرّمِي
رْبِحْتِي "مَرِسْ"!!
**
جسمي شعل
ـ1ـ
حْمِلْنِي.. عَ زِنْدَكْ حِطّنِي
وْعَ صَدرْ عَامِرْ شِدّنِي
وْخِدْنِي عَ دِنْيِي مْبَحْبَحَه
بِالْحُبّ.. أُوعَا تْرِدّنِي
ـ2ـ
خِدْنِي عَ أُوضَه مْعَتّمِه
عَ فْرَاشْهَا تَا نِرْتِمِي
جِسْمِي شِعِلْ.. دَمِّي حِمِي
عَجِّلْ بِمَيَّكْ رِشّنِي
ـ3ـ
خَدِّي لِهِبْ.. عُنْقِي احْتَرَقْ
قَلْبِي سَهمْ شَهْوِه اخْتَرَقْ
وعَ دَرْب جِسْمِي مَا مَرَقْ
غَيْرَكْ إِنِتْ.. لا تْصُدّنِي
**
حلمتك
ـ1ـ
هَـ الْحَلْمِة اللِّي مْشَوّبِه
يَا مَا قْلُوب مْدَوّبِه
وْمَكْتُوبْ حَدَّا عَ النَّهدْ
لا تِلمْسُونِي.. مْكَهِرْبِه!!
ـ2ـ
حَلْمِتِكْ.. يَا زْغَيَّرَه
مِتْعَجِرْفِه.. وْمِتْكَبَّرَه
مِينْ خَبَّرَا.. هِيِّي الدِّنِي
يَا زْغِيرْتِي.. وِالآخِرَه؟!
ـ3ـ
ما أَطْيَبَا هَـ الْفُسْتَقَه
وْهَـ الْفُسْتَقَه يَا مْرَاهِقَه
عَمْ تِنْعَبَدْ بِهَـالدِّنِي
مِتْل الإِلَـه الْـ خَالِقَا!!
**
حفلة رقص
ـ1ـ
جْنُون وْطَرَبْ وِزْقِيفْ وِغْنَانِي
وْصَالِةْ رَقصْ بِالنَّاسْ مِلْيَانِه
وْضَوّ خَافِتْ.. مِسْتِحِي وْمَحْمَرّْ
وْكِلّ شَبّْ حَدُّو بِنْتْ سِكْرَانِه!!
ـ2ـ
وْكَاسَاتْ وِيسْكِي نَازْلِه دْمُوعَا
وْصَوْت مُطْرِبْ مَصْدَرُو آلِـه
وْعَ الْبَارْ قنِّينَاتْ مَجْرُوعَه
صْنَادِيقْ بِيرَه مُعْظَمَا خَالِي
وْخِيطَانْ زِينِه نِصّ مَقْطُوعَه
زِينِه قَدِيمِه وْخَيطْهَا بَالِي
وْعَ الأَرْضْ نِفَّيْخَاتْ مَفْقُوعَه
بْإِيدَيْنْ مَا بْتِرْحَمْ وَلا تْبَالِي
وْدِيسْكَاتْ بِالصّنْدُوقْ مَجْمُوعَه
عَ قَدّ مَا فِي نَاسْ بِالصَّالِه
وْضِحْكاتْ سِكْر وْطَيْش مَسْمُوعَه
وِالنَّاسْ مِتْل شْبَاحْ بِلْيَالِي
وْبَوْسَاتْ تِـمّ وْخَدّ مَطْبُوعَه
وْنَهْدَاتْ شَمّ وْضَمّ عَ الْعَالِي
وْبِيكْ ـ أبّ عَمْ بِيقَلِّد الْعُشَّاقْ
طُول الْوَقتْ حَاضِنْ إِسِطْوَانِه
**
بصران
ـ1ـ
بُصْرَانْ.. شُو بُصْرَان بِمْنَامِي؟
طَيْرَيْنْ بِيض زْغَارْ
وْمَوْقَدِه لِلنَّارْ
عَمْ تِنِشْوِي عَ جَمِرْهَا حْمَامِه!!
ـ2ـ
بُصْرَانْ إِنِّي رَاكِب حْصَانِكْ
بْلَيْل مَا فِي نْجُومْ
وِمْسَيْرَحُو بِكْرومْ
فِيهَا الْعِنَبْ عَ كْتَافْ رُمَّانِكْ!!
ـ3ـ
بُصْرَانْ حَالِي وِالشِّتِي عَايِمْ
عَمْ إِغْزُل مْلاحِفْ
عَمْ حَيِّك شْرَاشِفْ
وْمِتِّكِي عَ جَنْبِكِ.. وْنَايِمْ

اقلب الصفحة من فضلك

انتبهي

2006-04-20T17:31:00.000-07:00

يا دنيي
قلْتْ: يَا دِنْيِي ارْحَمِي شَبّ احْتَرَفْ
عَادِه وَخِيمِه مِجِرْمِه.. سَلْب الشَّرَفْ
شَرَّدْ بَنَات كْتَارْ عَ دْرُوب الأَمَلْ
بَعْد اللَّيَالِي الْحَالْمِه.. لْيَالِي التَّرَفْ!!
**
خطي
ما بْتِذِكْرِي بِالْحَيّْ
بُوَّسْتِكْ وْفِزْعَانْ
لا تْخَيّبِي ظَنِّي
وْمَا تِنْطرِينِي شْوَيّْ
تا حَوِّش الرُّمَّانْ
الْـ دَاخِلْ الْجَنِّه
شُو قِصّتِكْ يَا مَيّْ
بِتْوَلّعِي النِّيرَانْ
وِبْتِهِرْبِي مِنِّي
عَمْ تِقِتْلِينِي.. خْطَيّْ
لا تِقِتْلِي إِنْسَانْ
لا تِبِعْدِي عَنِّي!!
**
انتبهي
ـ1ـ
مْعَلّمِه الْبَوْسَاتْ عَ خْدُودِكْ..
عَ شْفَافِك الْحَمْرَا.. وْعَ زْنُودِكْ
وْعَ مْطَارِح الْـ فِيهَا إِثَارَه كْتِيرْ
عَ أَتُون النَّارْ.. عَ نْهُودِكْ!!
ـ2ـ
وِمْبَيّنِه آثَارْ شَبّ زْغَيرْ
انْتِبْهِي مَا أمِّكْ تِشتْلِقْ لَيْهَا
وْيَا دِلّ دِلِّكْ كِيفْ رَحْ بِيصِيرْ
بِحْوَالِكْ.. وْشَافِتْ بِعِينَيْهَا
بْقَايَا حَبِيب مْقَطَّف وْرُودِكْ!!
ـ3ـ
انْتِبْهِي مَا بَيِّكْ تِشْرُد عْيُونُو
وِيْشُوفِك وْتِتْلَبَّك فْكَارُو
وْيَا خْطَيّتِكْ لَوْ صَدْقِت ظْنُونُو
رَحْ يِرِجْمِكْ بِـ أَكْبَر حْجَارُو
وْيِصْرُخْ بِوِجِّكْ: عَاهْرَه مُوتِي
أَحْسَنْ ما يِبْقَى الْعَارْ بِوْجُودِكْ!!
**
هند
هِنْد.. لَوْلا كْلامِكْ هَـ الْحِلُو
لَكِنْت عِفْتِكْ مِنْ زَمَان بعِيدْ
فِي بَنَات كْتَارْ عَمَّا يِسْأَلُوا
عَنْ قَلْب فَارِغْ للإيجَارْ جْدِيدْ!!
**
شاعر
بَيِّكْ طَرَدْنِي وْمَا قِبِلْ فِيِّي
كُونْ صِهْرُو.. وْطَبْطَبْ عْلَيِّي
سْأَلْت السَّبَبْ.. تَارِي السَّبَبْ إِنِّي
مْعَتَّرْ فَقِير.. وْشُو هَـ الِخْطِيِّه؟!
قُولِي لْبَيِّكْ يِعْتِذِرْ مِنِّي
وْقُولِي بْحِبُّو كْتِيرْ يَا بَيِّي
وْقُولِي النَّاس الْـ خَبَّرُو عَنِّي
عَمْ يِكْذِبُوا وِيْبَغِّضُو فِيِّي
شَاعِرْ أَنَا.. بْصَوِّرْ أَلِفْ جَنِّه
وْعِنْدِي الشِّعِرْ يَنْبُوعْ حِنِّيِّه
بْخَلِّي الدِّنِي تِتْلَهَّفْ لْفَنِّي
بْخَلِّي الْحَرْف صُنْدُوقْ مَالِيِّه!!
**
شعرك
ـ1ـ
شَعْرِكْ، يَا يِخْزِي الْعَيْن، مَا أَحْلاهْ
شَلاَّلْ وَرْد مْطَعَّم بْكَوْثَرْ
بْحِسّْ، لِمِّنْ بِلْمَحُو، إِنِّي إِلـهْ
وِبْدُوخْ، لِمِّنْ بِلْمِسُو، وْبِسْكَرْ
ـ2ـ
اللَّيْل.. خُصْلِةْ شَعْر مِنْ شَعْرِكْ
النَّجْمَاتْ، لَوْلا مْعَزّتُو، بِتْغِيبْ
مَشْلُوحْ، مِتْكِي بْغُنْج عَ ضَهْرِكْ
غَافِي.. وْعَمّ بِيفُوحْ مِنُّو الطِّيبْ
ـ3ـ
جْدَادِيلْ غَيْم مْعَلّْقَه بِالرِّيحْ
هْنِيَّالْ يَللِّي بْيُغْمُر الْغَيْمِه
مِتْل اللِّي قَضَّى الْعُمْر بِالتّسْبِيحْ
تَا يْنَالْ مِنْ رَبّ الْبَشَرْ نِعْمِه!

اقلب الصفحة من فضلك

بدي بوسك

2006-04-20T17:29:00.000-07:00

قاضي
ـ1ـ
شُو هَـ الْعَادِه.. شُو هَـ الْعَادِه؟
بَعِّدْ عَنِّي.. إِيدَكْ عَنِّي
مَا عَادْ فِيِّي إِعْطِي زْيَادِه
بِفْزَعْ إِنَّكْ تِقْرَفْ مِنِّي
ـ2ـ
بْحِبَّكْ قَدّْ الدِّنِي كِلاَّ
وْجَنِّةْ جِسْمِي مَا بْيِحْتَلاَّ
غَيْرَكْ.. لَكِنْ مَا بْتِفْهَمْنِي
مَطْلُوبَكْ تِهْجُمْ تَاكِلْنِي
كِلّ ما كِنْت شْوَيِّه فَاضِي
ـ3ـ
وَقِّفْ.. وَقِّفْ.. لا ما بْيِسْوَى
إِيدَكْ دَخْلَكْ عَمْ إِتْلَوَّى
بْجَمْرَاتَكْ حَاجِي تِحْرِقْنِي
بِهْرُبْ مِنَّكْ وِبْتِلْحَقْنِي
جَلاَّدْ.. وْبِتْقِلِّي: قَاضِي!!
**
تقيل
ـ1ـ
يِقْطَعَكْ شُو تْقِيلْ
شْرِبْت مَيَّاتِي
وِسْرَقْت خَيْرَاتِي
وْمَا بْتِعِتْرِفْ بِجْمِيلْ
ـ2ـ
رْبِينَا سَوَا رْبِينَا
الْبَيْت حَدّ الْبَيْتْ
وِالْحَيْط.. مَا فِي حَيْطْ
وْكَرْجِتْ لَيالينَا
زْغَارْ.. ما بِيهِمّْ
الدَّمّ بَعْدُو دَمّْ
وْمِتِل شِي بَيّْ وْمِتِلْ شِي أُم
لْعِبْنَا تَا شْقِينَا
وْمَا بْتِعِتْرِفْ بِجْمِيلْ؟
تْقِيلْ إِنْت تْقِيلْ..
**
بدّي بوسك
ـ1ـ
بَدِّي بُوسِكْ تَحْت الرَّقْبِه
بَدِّي طَفِّي النَّار بْقَلْبِي
بَدِّي مِصّ خْدُودِكْ.. تِمِّكْ
مَا بِيهِمّ انْ زِعْلِتْ أُمِّكْ
عَلِّي.. عَلِّي شْوَيِّه كِمِّكْ
وْشُو ما قَالِتْ أُوعَا يْهِمِّكْ
إِنْتِي الشَّمْس الْـ ضَوِّتْ دَرْبِي
إِنْتِي الْحُلم بْلَيْل الْغُرْبِه
بِغْيَابِي.. رَح يِنْشَفْ دَمِّكْ
وْبِوْجُودِي.. بْبَوْسَاتِي بْطمِّكْ
ـ2ـ
نِيرَانِي عَمْ تِقْوَى أَكْتَرْ
كِل مَا كْبِرْت.. بْشِيبْ وْبِزْغَرْ
وِعْيُونِي بْتِفْضَحْ أَسْرَارِي
وِبْتِغْرَق بِاللَّوْن الأَحْمَرْ
يَا نَارِي.. طَفِّيلِي نَارِي
وْخَلِّينِي مِنْ رِيقِكْ إِسْكَرْ
إِزْرَع بْوَادِيكِي بْدَارِي
وْإِحصُد قَمح الصّدر الأَصْفَرْ
وْآخُدْ مِنْ حَلْمَاتِكْ تَارِي
عَضُّنْ.. إِقْرِصْهُنْ.. إِفْرِكْهُنْ
إِجْلِيهُنْ.. وِيْطقّ الْمَرْمَرْ
ـ3ـ
مُشْ رَحْ قِلِّكْ طَار صْوَابِي
مُشْ رَحْ إِحْكِيلِكْ عَ عْذَابِي
مُشْ رَحْ خَلِّيكِي تِشْتِلْقِي
عَ الْجُوع الْـ هَدَّلِّي رْكَابِي
مُشْ رَحْ إِحْكِي بْيِنْشَفْ حَلْقِي
وِبْتِعْرَقْ كِلْمَات كْتَابِي
مُشْ رَحْ إِحْكِي بْيِطْلَعْ خلْقِي
وِبْتِدبلْ ضِحْكِه كِذَّابِه
خَلِّينِي.. لازِمْ تِنْطِلْقِي
وْعَ دْرُوبِي يِتْعَرَّفْ جِسْمِكْ
وِتْرِدِّينِي لْعِزّ شْبَابِي..
**
دنية حبق
تِيريزْ.. يَا دِنْيِةْ حَبَقْ
فِيكِي السِّحْر كِلُّو انْدَلَقْ
إِنْتِي الدِّنِي وْشَمْس الدِّنِي
يَا وَرْدِة الْعُمْر الْهَنِي
الْخَالِقْ.. عَ شَكْلِكْ مَا خَلَقْ.
**
غدّار
ـ1ـ
غَدَّارْ!!
مِينْ قَالْ عَنَّكْ هَيْكْ
وْإِنْت الْوَفَا بْعِينَيْكْ
وْإِنْت الْحَلاَ كِلُّو
وِعْلَيْك دَلُّوا عْلَيْكْ
نْجُومْ السَّمَا يَا جَارْ
وْبَعْدُنْ عَمِ يْدِلُّوا؟
ـ2ـ
غَدَّارْ!! مُشْ مَعْقُولْ
عَنْ شَبّ مِتْلَكْ قُولْ
لَكِنْ يَا نُورْ الْعَيْنْ
عُزَّالْنَا مِنْ وَيْنْ
جَابُوا الْحَكِي الْمِسْوَدّْ
تَا فَرَّقُوا مَا بَيْنْ
قَلْبَيْنْ حَبُّوا بَعْضْ
وْمَا سَاعِتُنْ هَـ الأَرْضْ؟
ـ3ـ
غَدَّارْ!!.. يَا دِلِّي
ما بْقُولْ هَـ الْكِلْمِه
وْلا بْفِيقْ مِنْ حُلْمِي
وْإِنْت الْحُلمْ يَللِّي
عَمْ بِحْلَمُو.. وْصَرْلِي
سِنْتَيْن نَاطِرْتُو
تْغَيَّرْ بِـ آخِرْتُو
وْضَاعْ مِنْ دَرْبِي
وْغَابْ عَنْ قَلْبِي
وْكِلّ اللِّي كَاتِبْتُو
عَنْ حُبَّكْ وْحُبِّي
رْمِيتُو بْقَلْب النَّارْ
وْصَارْ.. يِمْكِنْ صَارْ
دُخَّانْ أَوْ فَحْمِه!!

اقلب الصفحة من فضلك

شهوة جسم

2006-04-20T17:26:00.000-07:00

شتي نازل
ـ1ـ
رِخْيِتْ شَعْرَا عَ كْتَافَا
مِتْل الشِّتِي النَّازِلْ
سَاعَه يْبَوِّسْلاَ شْفَافَا
وْسَاعَه بَدُّو يْقَاتِلْ!
ـ2ـ
عَمْ يِهْجُمْ عْلَيْهَا
تَا يْغَمِّضْ عِينَيْهَا
وْهِيِّي تْرِدُّو بْدَيْهَا
مَا بَدَّا مَشَاكِلْ.
**
زيح
إِيدَيِّي انْمَدِّتْ لِلرِّيحْ
لا تْخَبِّي دَيْكِي
رَحْ إِرْسُمْ إِيدَيِّي زِيحْ
يْوَصِّلْنِي عْلَيْكِي
عَ الصّدْر الْـ بَدُّو تِلْوِيحْ
عَ التِّمْ الْـ كِلُّو تْسَابِيحْ
عَ رْخَام إِجْرَيْكي..
**
بيتك
ـ1ـ
يَا حُلْوتي.. هَـ الدَّارْ
الْمَبْنِيِّه عَ حْفَافِي
مِنْ ضُلُوعِي حْجَارْ
بَيْتِك الْغَافِي
عَ فْرَاشْ مِنْ أَزْهَارْ
نَايِـم وْدَافِي
ـ2ـ
بَيْتِكْ مَع النَّجْمَاتْ
بْيِتْغَامَزْ بْهَاللَّيْلْ
وْبِيدَرْدِشْ حْكَايَاتْ
وْبِيحَاكِي نَجْم سْهَيْلْ
وْنُور الْقَمَرْ لَوْحَاتْ
رَاسِمْ عَ تَانِي مَيْلْ
مِنْ هَـ الْفَضا الصَّافِي
ـ3ـ
بَيْتِكْ.. أَنَا بْزُورُو
كِلّ يَوْم صُبْحِيِّه
بْتِتْسَابَق طْيُورُو
تَا تْطِيرْ حْوَالَيِّي
وِبْبَوِّس زْهُورُو
بِرْمُوش عِينَيِّي
تَا حَرْقِص شْفَافِي
**
عيونك
ـ1ـ
عْيُونَكْ شَمسْ.. يَا رَيْت بَعْرِفْ شُو فِيَا
مِنْ حُبّْ نَحْوِي وْمِنْ عَطفْ
تَا إِشكرَكْ عَ هَـ اللُّطْفْ
وِانْ كَانْ مَا فِيهَا حَنَان وْحُبّْ
بِرْكَع بْصَلِّي وْبِطْلُب مْنِ الرَّبّْ
يْوَدِّي صَوَاعِقْ عَ الْعُيُون وْيِفْقِيَا
ـ2ـ
صَرْلِي سِنِه بِتْطَلَّع بْعِينَيْكْ
وْما بْخَافْ إِنِّي إِحْتِرِقْ
وِبْخَبّرَكْ قَلْبِي غِرِقْ
بِبْحَيرتَكْ.. رَحْمِه انْشِلُو بْإِيدَيْكْ
ـ3ـ
لا تِظْلُم الْمَظْلُومْ أَكْتَرْ ما انْظَلَمْ
لَيْقُومْ أَللَّـه يِضِرْبَكْ
بِالآخْرَه.. وِيْعَذّبَكْ
وِتْصِيرْ تَعْرِفْ شُو الْمَحَبِّه.. وْشُو الأَلَـمْ؟
**
يا حلوة
ـ1ـ
يَا حُلْوِه الْـ عَمْ بِتْصَلِّي
وْبِعْيُونِكْ حُبّْ
يِمْكِن بْعَصْر الْقِلِّه
مَا تْلاقِي شَبّْ
ـ2ـ
صَايِرْ سَكْرَان بْحُبِّكْ
مَقْطُوع الْحَيْلْ
وْعَمْ بِحْلَمْ إِنِّي بْقُرْبِكْ
وِالدِّنْيِي لَيْلْ
ـ3ـ
تْوَقِّي تْوَقِّي يَا سَمْرَا
بِهَـ الأَيَّامْ
الْحُلْوِه اللِّي بْتِهْدِي زَهْرَه
مْنِ الصَّعْب تْنَامْ
ـ4ـ
رْمُوش عْيُونِكْ يَا عْيُونِي
جَوْز بْوَارِيدْ
بِرْصَاصَاتُنْ رِمْيُونِي
وْزَتُّونِي بْعِيدْ
**
شهوة جسـم
ـ1ـ
لَوْ كَانْ عِنْدِي لِلْخَطِيِّه مَيْلْ
كِنْتْ سْبَحِتْ بِبْحُورْ عِينَيْكِي
وْكِنْت وْصِلِتْ عَ شّطّ هَاك اللَّيْلْ
مَطْرَحْ مَا فِينِي إِحْصَل عْلَيْكِي!!
ـ2ـ
كنت كْتَبتْ عَ وْرَاقْ وَرْدَاتِكْ
أَشْعَارْ صَعْب كْتِيرْ تِمْحِيهَا
تَا كِلّ مَا قْطَفْتِي بْدَيَّاتِكْ
وَرْدِه.. تْشِمِّيهَا وْتِقْرِيهَا
ـ3ـ
وْكِنتْ عَ بَابِكْ وْقِفت سْنِينْ
حامِلْ كَمَنْجَه وْبَاقِة رْيَاحِينْ
تَا كِيفْ مَا تْرُوحِي وْتِجِي عَ الدَّرْبْ
غَنِّي لْعُيُونِكْ أَجْمَل تْلاحِينْ
ـ4ـ
وْكنت بِالْغِيرِه زْرَعِتْ قَلْبِكْ
وْقَلْبِكْ طفلْ مَا دَاقْ طَعْم الْحُبّْ
تَا تْطَاوْعِينِي.. وْتشكرِي رَبِّكْ
عَ هَالْمَحَبِّه الْـ مُشْ سَايِعْهَا الْقَلبْ
ـ5ـ
لَوْ كانْ بَدِّي.. بَسّ مَا بَدِّي
وَسِّخْ ضَمِيرِي وْغَبِّرْ عْيُونِي
وْشَمْس الطَّهَارَه تْصِيرْ مِسْوَدِّه
كِرْمَالْ شَهْوِة جسم مَجْنُونِه

اقلب الصفحة من فضلك

دقيلو جراسك

2006-04-20T17:14:00.000-07:00

لا تمنعوني حب
غنتها ريما الياس
ـ1ـ
لا تِمْنَعُونِي حِبّْ
لا تْعَتّمُوا قَلْبِي
الْحُبّ أَجْمَلْ دَرْبْ
وِالرَّبّ مْحِبِّه
ـ2ـ
خَلُّوها تْزَهِّرْ إِيدَيِّي
وِتِغْرَقْ بِالْفَرْحَه عِينَيِّي
وْشَمْعَات الْحُبّ الْمِنْسِيِّه
تْنَوِّرْ عَتْمَاتِي بِالغُربِه
ـ3ـ
غَرِيبِه الْقِصَّه غَرِيبِه
أَللـه بْأَسْرَارُو الْعَجِيبِه
هُوِّي الْـ بِينَقِّي حَبِيبِي
لا تْرِشُّوا الآهات بْدَرْبِي
ـ4ـ
جِينَا عَ دِنْيِي.. سَرْقِتْنَا
وْصَارِتْ تِلْعَب بِمْحَبِّتْنَا
لا اخْتَرْنَاهَا وْلاَ اخْتَارِتْنَا
كِذْبِه..وْعَمّ نْعِيش الْكِذْبِه!!
**
أربعة مشاهد حب
المشهد الأوّل:
عَ قَدّْ مَا ضْحِكْتِي وَقَعْ
نِصّ الضّحكْ عَ الأَرْضْ
يَا ضِحْكِة الْـ مَا بْتِنْسَمَعْ
ردِّي عَن شْفَافِي وَجَعْ
أَسْوَد بِـ لَوْن الْبُغْضْ
المشهد الثاني:
ـ1ـ
طَلِّتْ..
وْيَا رَيْتْ مَا طَلِّتْ!!
الْحُبّ كِلُّو سَرقتُو
وِشْوَيّ مَا خَلِّتْ
قَلْبِي انْجَرَحْ.. يَا خْطَيّتُو!!
ـ2ـ
تِمْتَمِتْ: شُو بَدِّي فِيَا
مَا كنْتْ لازِمْ حَاكِيَا
وْلا إِبْصَرَا بْنَوْمِي
تَارِي إِذَا بِتْدَارِيَا
وْمِتل الزُّهورْ بْتِسْقِيَا
بْتِضْوِي متل نجْمِه
مْنِ الصَّعبْ إِنَّكْ تِطْفِيَا!!
المشهد الثالث:
لَيْلِه مْنِ لْيَالِي السَّهَرْ
سَرْقِتْ حَالاَ مِنْ أَهْلاَ
الْحلْوِه.. وْمَا عِنْدُنْ خَبَرْ
وْصدْفِه بيطِلّ الْقَمَرْ
فِزْعِتْ.. مِشْيِتْ عَ مَهْلاَ
وْتَمْتَمِتْ وِمْنَرْفِزِه:
لَشُو تِطْلَعْ يَا قَمَرْ؟!
المشهد الرابع:
رَحْ ضَلّ حِبِّكْ تَا يْدُوبْ اللَّوْنْ
وْتِدْبَل عْيُون الْبَشَرْ كِلاَّ
وْمَا يْضَلّ غَيْرِي وْغَيْرِك بْهَالْكَوْنْ
نْفَبْرِكْ بَشَرْ.. تَا يعبْدُوا أَللــه!!
**
كل ما تقولي
ـ1ـ
كلْ مَا تْقُولِي: حبّنِي أَكْتَرْ
بْحِسّْ فِكْرِي مْلَبَّكْ مْحَيَّرْ
أَفْكَارْ تَاخِدْنِي لْخَلْف الْكَوْنْ
وْأَفْكَار تِزْرَعْنِي قْبَالِكْ هَوْنْ
وْقِدَّامْ عِينَيِّي الدِّنِي تِزْغَرْ
ـ2ـ
وْكِل مَا تْقُولِي: اشْتَقتْ يَا حُبِّي
ضَوّ وْعَبِيرْ بْتِفرشِي بْدَرْبِي
وْبِتْعَيّشينِي بْدِنْيِة الأَحْلامْ
وِبْتِحِرْمِينِي اللَّيْلْ كِلُّو نَامْ
وْبِتْصَوّرِيلِي قْلُوبْ عَ قَلْبِي
ـ3ـ
وْكِل مَا تْقُولِي: تْنَعَّم بْفَنِّي
بْتِخْلَقِيلِي مْلايْكِه وْجَنِّه
وِنْجُومْ مَشْرُورَه بْسَوَاد اللَّيْلْ
وْمَرْكَبِه بَيْضَا عَ لَوْن الْخَيْلْ
وْخِيَّالْ صُورَه مْزَغرَه عَنِّي
ـ4ـ
وْكل مَا تْقُولِي: ضْحَاكْ يَا أَسْمَرْ
بِتْفُوح مِنِّي رِيحْة الزَّعْتَرْ
وِزْهُورْ خِلْقَانِه بِالِبْرَارِي
وْمَا فِي حَدَا بِوْجُودْهَا دَارِي
وْمِنَّا لَحَالاَ بْهَـالدِّنِي تِكْبَرْ
ـ5ـ
وْكل ما تْقُولِي: بْغَارْ يَا عْيُونِي
بْتِزْرَعِيلِي الشَّوكْ بِظْنُونِي
وِبْتِسِكْبِيلِي الزَّيْت فَوْق النَّارْ
وْمِن غِيرْتِكْ.. يِمْكِنْ أَنَا رَح غَارْ
وْلِلْكَونْ كِلُّو إِعْلُن جْنُونِي..
**
ليش حبّيتك
ـ1ـ
عَمْ تِسْأَلِينِي لَيْشْ حِبَّيْتِكْ
وْلَيْشْ جُوَّا الْقَلْبْ خِبَّيْتِكْ
وْمُشْ عَارْفِه تِخْمِينْ؟!
صَرْلِي سْنِينْ سْنِينْ
رَاسْمِكْ صُورَه بْعِينَيِّي
مْلَوّنِه بِالْحُبّْ
وِمْزَيّنِه بِزْهُورْ حِنِّيِّه
وْعَمْ فَتِّش عْلَيْكِي
عَ أَلْف دَرْب وْدَرْبْ
يِمْكِنْ عْلَيْهَا انْطَبْعِت جْرَيْكِي
وْيِمكِن تْكُون تْوَصِّل لْبَيْتِكْ
صَدّقِينِي.. دِخِتْ تَا لْقَيْتِكْ!!
ـ2ـ
لْقَيْتِكْ حَقِيقَه سَاطْعَه قْبَالِي
مِتْل النّجوم الْـ بِالسَّمَا
وْمِن كِتِرْ وَهْجِكْ صِرْتْ خَافْ مْنِ الْعَمَى
وْصِرْتْ مِنْ حَالِي
غَارْ عَ حَالِي
وْيَامَا وْيَامَا عَنّ عَ بَالِي
إحرُم عْيُونِي
تِلْمَح خْدود.. شْفَافْ مَجْنُونِه
وْشَعرْ أَسْوَدْ حَامِل لْيَالِي..
ـ3ـ
لَوْ كَانْ فِيكِي تِجْمَعِي دْمُوعِي
كِنْتِي عْمِلْتِي نَهْرْ
وْلَوْ كَانْ عِنْدِكْ وَقْتْ تِقْرِي شِعْرْ
كان الشِّعر خَبَّرْ
قِدَّيْشْ دِقْت الْقَهْرْ
وْقِدَّيْشْ كِرْمَالِكْ كِنِتْ إِسْهَرْ
وْتِسْهَرْ مَعِي شْمُوعِي..
ـ4ـ
كِنْتِي بْقَلْبِي قَبِلْ مَا تْكُونِي
وْكِنْتِي وَحِي فْكَارِي
وْكِنْتِي تْنَامِي بَيْنْ أَشْعَارِي
وْعَ مْخَدّتِي يَامَا غْفِيتِي سْنِينْ
وْيَامَا رْقَصْتِي فَوْقْ آهَاتِي
عَ صَوْتْ قَلْبِي الْـ كانْ مِتْيَتَّمْ حَزِينْ
الْـ خَلاَّ الدُّمُوع تْجِفّ بِعْيُونِي
وْخَلاَّ حَيَاتِي تِكْرَه حْيَاتِي
وْخَلاَّ لْسَانِي يِعْلُن جْنُونِي
ـ5ـ
وْبِالآخْرَه لْقَيْتِكْ:
نَايْ وْمُوسِيقَى وْعطرْ
وْأَلْفْ قِطْعِةْ شِعرْ
بَدِّي جْنُونْ الدَّهرْ
تَا أَلِّفُنْ.. مَا عَادْ عِنْدِي عُمرْ
وِلْهَالسَّبَبْ يَا نُورْ عِينَيِّي
انْكَانْ بَدِّكْ تِشفقِي عْلَيِّي
لا تِسْاَلِينِي لَيْشْ حِبَّيْتِكْ؟
**
أزهار
تْعِجَّبتْ كِيفِكْ لابْسِي بْنُوَّارْ
فسْتَانْ.. مِنْ وَرْدُو الْوَردْ بِيغَارْ
وْمِنْ كِترْ مَا صَفَّى الْجِسِمْ مَعْجُوقْ
وْوَرْدْ خَدِّكْ بِالْوَردْ مَخْنُوقْ
وِشْوَشْتِك.. وْإِيدِي تْفِكّ زْرَارْ:
الأَزْهَارْ مَا بِتْزَيِّنَا أَزْهَارْ!!
**
إيدك بإيدو
ـ1ـ
إِيدِك بْإِيدُو؟!.. عَيْبْ شُو صَابِكْ
مِتل الشّهُور بْيِمْرَقُوا حْبَابِكْ؟!
انْ كِنْتِي " السِّنِه " رُوزْنَامْتِكْ أَوْهَامْ
انْ كِنْتِي " الزَّهر " عُمر الزَّهر أَيَّامْ
وْنَاطِر خَرِيف وْبَرد عَ بْوَابِكْ؟!..
ـ3ـ
إِيدِك بْإِيدُو؟!.. وْضحكتِكْ قِنْطَارْ
وْشَعْرِكْ عَلَى كْتَافُو عِمِلْ مشْوَارْ
وْصَابِيعِك بْيِتْفَاخْرُوا بْبَصْمَاتْ
يَا أَلف عَيْب الشُّومْ.. كِلاَّ عَارْ
وِتْطِيرْ مِنْ كِتْرِ الْجهل آهاتْ
مِنْ نَارْهَا.. يَا دِلّ دِلّ النَّارْ
وْتِقْرَفْ طَرِيقْ الْحُبّ مِنْ دَعْسَاتْ
أَتْقَلْ مِنِ الْحِقْد بْقَلب غَدَّارْ
يَا بِنت.. مُشْ زِعْلانْ عَ سَهْرَاتْ
يَا مَا تْرِجَّيْتِي وْقِلْتِي سْهَارْ
زِعْلانْ مِنْ حَالِي.. وْمِنْ كِلْمَاتْ
قْعَدْت إِكْتِبْهَا بْقَلَمْ مَجْرُوحْ
رحْتِي.. وْيَا حَسْرَه.. بِقْيِت الأَشْعَارْ!!
**
بدي حبّك
ـ1ـ
بْيِكْفِينِي.. بْيِكْفِينِي بَسّْ
أُوقَفْ إِتْطَلَّعْ فِيكِي
وْخَبِّيكِي بِعْيُونِي شَمْسْ
كِل ما تْعَتِّمْ إِضْوِيكِي
ـ2ـ
لَوْ مَنْعُوا إِيدِي تِنْمَدّْ
وْحَطُّوا بَيْنِي وْبَيْنِكْ سَدّْ
بْيِكْفِينِي حَوِّشْلِكْ وَرْدْ
وِبْأَحْلامِي إِهْدِيكِي..
ـ3ـ
بَدِّي حِبِّكْ مَهْمَا صَارْ
غِيرِتْهُنْ بِتْطَفِّي النَّارْ
الْـ حَرْقِتْ قَلْبِي لَيْل نْهَارْ
وْفِكْرِي الْـ عَمْ بِينَاجِيكي
ـ4ـ
فِرْحُوا لِمِّنْ سَرْقُوكِي
وِبْكِذْبَاتُنْ لَفُّوكِي
وْنِسْيُوا مُشْ رَحْ يِعْطُوكِي
قَدّ مَا الْحُبّ بْيِعْطِيكِي
**
دقِّيلو جراسك
ـ1ـ
دِقِّيلُو.. دِقِّيلُو جْرَاسِكْ
بَرْكِي بْيِحْضَرْلِكْ قدَّاسِكْ
حْسَابَاتِكْ كِلاَّ حْسِبْنَاهَا
وِمْحِينَا دْرُوب مْشينَاها
وْهَاك الدَّمْعَه اللِّي سْكَبْنَاهَا
خَمْرَه.. وْعَم بِتْئِنّ بْكَاسِكْ
ـ2ـ
دِقِّيلُو.. وْقَوِّيلُو الدَّقَه
دَقَّاتِكْ وَحْدَا الْـ رَحْ تِبْقَى
نِحْنَا مْرَقْنَا.. وْهُوِّي بْيِمْرُقْ
أَيَّام.. وْشَمْسُو مَا بْتِشْرُقْ
وْمَهْمَا وَهْج عْيُونِكْ يِسْرُقْ
رَح يِدْبَلْ عَ حْدُود الْمَلْقَى
ـ3ـ
حُبِّكْ.. مُشْ مَعْرُوفِه أْصُولُو
غَيْمِه صَيْفِيِّه.. بِيقُولُوا
غَبْرَه.. وْمُشْ مَحْسُوب حْسَابَا
إِيدَيْن.. بْتِشْحَدْ أَحْبَابَا
وْبِتْعَذِّبْهُنْ عُمر بْطُولُو..
ـ4ـ
مَوْجُودِه.. وْمَنِّكْ مَوْجُودِه
تَلْجَاتِكْ دَابِتْ عَ جْرُودِي
لَوْ رِجْعِتْ أَيَّام الْمَاضِي
وْصَفَّى الْعَالَـمْ كِلُّو رَاضِي
وْقَلْبِي مْنِ عْذَابَاتِكْ فَاضِي
إِنْتِي مُشْ مَسْمُوح تْعُودِي..
**
كيف بدّي نام؟!
ـ1ـ
آخْ مِنَّكْ يَا أَلَمْ
نِشَّفتْ دَمْعَات الْقَلَمْ
وِتْرَكتني جَرْجِرْ خَيَالْ
مَصْلُوبْ عَ شْفَافُو سُؤالْ
وْمَكْتُوبْ عَ جْبِينُو النَّدَمْ
ـ2ـ
آخْ مِنَّكْ.. كِيفْ بَدِّي نَامْ
وْغَيْرِي مَعَا نَايِمْ
عَ زْهُورْهَا حَايِمْ
وْتَحتْ مِنُّو جِسِمْهَا مِنْضَامْ
وَحِدْهَا بْتِنْلاَمْ
وَحِدْهَا بْتِنْلاَمْ
وِانْ جِيتْ مَرَّه إِجْرَحَا
بْيُوسَعْ بِـ قَلْبِي مَطْرَحَا
وِالْكِلْمِةِ اللِّي بْتِقْهَرَا أَيَّامْ
بِلْغِيَا
أَوْ بِمْحِيَا
أَوْ خَلفْ ضَهْرِي بِشْلَحَا..
ـ3ـ
يَا رَيْتْ ما تْرَكْتُو يِجِي
وْيِلْعَبْ بِـ عَقْلاَ.. يْغَيِّرَا
يِغْرَقْ بِعُطر بْنَفْسَجِي
مْغَلْغَلْ بِطفْلِه زْغَيَّرَه
تَارِي الْمَحَبِّه زَعْبَرَه
وْمُطْلَقْ صَبِيِّه مْكَبَّرَه
بَدَّا حَدَا
أَيَّا حَدَا
يْكَحِّل عُيُون مْزَهَّرَه
يْفَرْفِحْ جِسِمْ وِسْع الْمَدَى
يْطَفِّي الشَّهْوِه.. يْجَمِّدَا
بْصَرْخَاتْ مَا إِلْهَا صَدَى..